ورلڈ چیمپئن شپ آف لیجنڈز کے فائنل میں جنوبی افریقہ نے پاکستان کو شکست دیدی

اے بی ڈی ویلیئرز کی شاندار سنچری کی بدولت جنوبی افریقہ نے ورلڈ چیمپئن شپ آف لیجنڈز کے فائنل میں پاکستان کو آسانی سے شکست دے کر ٹائٹل اپنے نام کر لیا۔

تفصیلات کے مطابق 196 رنز کا ہدف جنوبی افریقہ نے ایک وکٹ کے نقصان پر 16 ویں اوور میں ہی پورا کر لیا۔ جنوبی افریقہ کی جانب سے اے بی ڈی ویلیئرز نے 120 رنز جبکہ ڈومنی نے 28 گیندوں پر 50 رنز کی دھواں دار بیٹنگ کی۔ پاکستان کی جانب سے واحد وکٹ سعید اجمل نے حاصل کی۔

اس سے قبل ورلڈ چیمپئن شپ آف لیجنڈز کے فائنل میں پہلے بیٹنگ کرتے ہوئے پاکستان نے مقرر 20 اوورز میں 5 وکٹوں کے نقصان پر 195 رنز بنائے تھے۔ پاکستان کی جانب سے شرجیل خان 76 جبکہ عمر امین 36 رنز بنا کر نمایاں رہے۔

جنوبی افریقہ کی جانب سے ہارڈس ولجوین اور وین پارنیل نے 2، 2 کھلاڑیوں کو پویلین کی راہ دکھائی۔

واضح رہے کہ پاکستان کو بھارتی ٹیم کے سیمی فائنل نہ کھیلنے پر واک اوور ملا، جبکہ جنوبی افریقہ نے آسٹریلیا کو 1 رن سے شکست دے کر فائنل میں جگہ بنائی۔